འཕྲུལ་ལས་རིག་པ་ཡར་རྒྱས་ཇེ་ཆེར་ཕྱིན་པའི་ས་ཁམས་ཆབ་སྲིད་དང་། དམག་དོན། དཔལ་འབྱོར་བཅས་སྔར་ལས་ལྷག་བརྟེན་དགོས་པ་འགྱུར་ཡོད་ལ་དེང་རབས་ཀྱི་འཛམ་གླིང་ནང་ལག་རྩལ་ཡར་ཐོན་དེ་མཐོ་ཚད་གསར་པ་ཞིག་ཏུ་སླེབས་བཞིན་ཡོད་པ་ཧ་ཅང་གསལ་པོ་རེད། མ་ཟད་ dot.com གསར་བརྗེ་བྱུང་བ་ནས་བཟུང་ལོ་ངོ་ཉི་ཤུ་ལྷག་ཙམ་སོང་ཡོད་ལ། འཕྲུལ་རིག་ལག་རྩལ་ཁྱབ་ཁོངས་འདིའི་འཕེལ་རྒྱས་ཧ་ཅང་བྱུང་བཞིན་ད་ལྟའི་འཛམ་གླིང་དཔལ་འབྱོར་ཀྱང་མེད་དུ་མི་རུང་བའི་ཆ་ཤས་ཞིག་ཏུ་འགྱུར་ཡོད། སྤྱིར་དྲ་རྒྱ་ནི་ལོ་རྒྱུས་ཐོག་འཛམ་གླིང་ཡོངས་ལ་ཆ་འཕྲིན་ཕྱི་གསལ་ནང་གསལ་གྱི་མཉམ་སྤྱོད་དང་། སྲིད་དོན་ལས་རིགས་དང་། སྲིད་གཞུང་གི་མ་ལག་སྣ་ཚོགས། དངུལ་ཁང་བཅས་ཀྱི་ཆེད་བཙུགས་པ་ཞིག་ཡིན་ལ། དྲ་རྒྱ་ནི་ཆ་ཤས་ཅན་གཙོ་བོ་ཞིག་ཏུ་འགྱུར་ཡོད། མ་ཟད་དྲ་རྒྱའི་མཉེན་ཁ་ནས་ཐར་ཆེད་བདེ་འཇགས་ལྡན་པའི་མ་ལག་དགོས་རྒྱུ་ནི་ཧ་ཅང་གི་གལ་གནད་ཆེ། དེང་སང་ས་གནས་སོ་སོའི་དྲ་རྒྱའི་སྤྱོད་སྟངས་ལའང་ཁྲིམས་ལུགས་མི་འདྲ་བ་ཡོད། Splinternet ཞེས་པ་ནི་ལག་རྩལ་དང་། ཚོང་དོན། ཆབ་སྲིད། མི་རིགས་རིང་ལུགས། ཆོས་ལུགས། རྒྱལ་ཁབ་ཀྱི་ཁེ་ཕན་ཁ་ཐོར་དུ་སོང་བ་སོགས་རྒྱུ་རྐྱེན་སྣ་ཚོགས་ཀྱི་དབང་གིས་དྲ་སྦྲེལ་ཁ་གྱེས་པའི་ཁྱད་ཆོས་ལ་ཟེར། རྒྱ་ནག་གི་ལྕགས་རི་རིང་པོ་ཡང་ Splinternet གྱི་གྱོད་གཞི་ཞིག་ཡིན་པས། རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱིས་ཁྲིམས་འཛུགས་ཀྱི་བྱ་སྤྱོད་དང་ལག་རྩལ་ཟུང་འབྲེལ་བྱས་ནས་དྲ་སྦྲེལ་ལྟ་སྐུལ་དོ་དམ་ཡང་བྱེད་བཞིན་ཡོད་པ་རེད། འཛམ་གླིང་ཐོག་གི་དམར་ཤོག་རྒྱལ་ཁབ་ཆེ་ཤོས་ཤིག་ཡིན་པའི་ཆ་ནས། འཕྲུལ་རིགས་ལག་རྩལ་དང་རྨང་གཞིའི་སྒྲིག་བཀོད་གསར་ཤོས་ཀྱི་སྒོ་ནས་མི་དམངས་སྤྱི་དང་ལྷག་པར་དུ་མི་སེར་སྤེལ་བའི་ཆབ་སྲིད་ཀྱི་གྲངས་ཉུང་མི་རིགས་ལ་དབང་སྒྱུར་བྱེད་མཞིན་ཡོད་པ་རེད། ད་དུང་ ༢༠༢༣ ལོ་ནས་བཟུང་ཁ་པར་འཕྲུལ་རིགས་ལག་རྩལ་དང་། དངོས་པོའི་འཕྲིན་སྦྲེལ་དྲ་བ། སྤྲིན་གྱི་རྨང་གཞིའི་ལག་རྩལ། བཟོ་ལས་ཀྱི་གོ་རིམ་རང་འགུལ་ཅན། འཕྲུལ་མིའི་ལག་རྩལ། གཞི་གྲངས་ཆེན་པོ། མིས་བཟོས་རིག་སྟོབས་སོགས་ཁྱབ་ཁོངས་ཀྱི་གསར་བརྗེ་རྒྱུན་ཆད་མེད་པ་ཡོང་སྟབས་རྨང་གཞི་སྒྲིག་བཀོད་ལའང་མགོ་རྙོག་བཟོ་ཡི་ཡོད། རྒྱ་ནག་གི་འདས་ཟིན་པའི་ལོ་ངོ་ཉི་ཤུའི་ནང་ཞིབ་ཚགས་ཅན་གྱི་འཕྲུལ་རིག་རྨང་གཞིའི་སྒྲིག་བཀོད་འཕེལ་རྒྱས་མགྱོགས་མྱུར་བྱུང་བ་དེས་རྒྱལ་ཁབ་ཅིག་གི་ཞིབ་བཤེར་དང་ལྟ་སྐུལ་ཚོད་འཛིན་གྱི་ནུས་པ་ཁྱད་དུ་འཕགས་ཡོད། འོན་ཀྱང་རྒྱ་ནག་གི་གློག་འཕྲིན་དྲ་བ་དང་། གློག་རྡུལ་ཀུང་སི། ཁ་པར་ཉེར་སྤྱོད་གོ་རིམ་བཅས་ལ་འཛམ་གླིང་རྒྱལ་ཁབ་ཡོངས་ཀྱི་ཞིབ་འཇུག་བྱེད་བཞིན་ཡོད་ལ་ སྤྱོད་པ་པོའི་སྒེར་གྱི་གསང་དོན་རྒྱུན་སྲིང་བྱེད་སྟངས་དང་འཕྲུལ་རིགས་བདེ་འཇགས་ལྡན་མིན། རྒྱ་ནག་གཞུང་དང་འབྲེལ་བ་ཡོད་མིན་བཅས་ལ་དྲི་བ་ཡོངས་ཀྱི་ཡོད།
༢༠༡༧ ལོར་རྒྱ་ནག་དྲ་སྦྲེལ་ཀུང་སི་ ByteDance ཡིས་ Musical.ly སྤྱོད་ཉེར་སྤྱོད་གོ་རིམ་འདི་ཉོས་པ་རེད། ( Shanghai ནང་བརྟེན་གཞི་བྱེད་ཡོད་ཀྱང་སྤྱོད་མཁན་མང་ཆེ་བ་ཨ་རི་བ་ཡིན་པ་རེད། ) ཉོ་སྒྲུབ་བྱས་རྗེས། ByteDance (ད་ལྟ་འཛམ་གླིང་ཐོག་གི་ཆེས་ཆེ་བའི་གསར་གཏོད་ཀུང་སི་) ཡིས་ཉེར་སྤྱོད་གོ་རིམ་ TikTok དེ་བསྐྱར་དུ་འཕུར་སྟེགས་བྱེད་ཞིང་། ༢༠༡༨ ལོའི་ཟླ་ ༨ པའི་སྔོན་ལ་ Musical.ly གི་རྩིས་ཐོ་ཚང་མ་གནས་སྤོ་བྱས་པ་རེད། ༢༠༢༢ ལོའི་ལོ་མཇུག་ཏུ་ཟླ་རེར་ Tiktok སྤྱོད་མཁན་དུང་ཕྱུར་ ༡༠ ལྷག་ཙམ་ཡོད་པ་དང་། འཛམ་གླིང་ཡོངས་སུ་ཕབ་ལེན་ཐེངས་གྲངས་དུང་ཕྱུར་ ༣༠ བྱས་ཡོད། ཨ་རིའི་ནང་ TikTok སྤྱོད་མཁན་ཧ་ལམ་དུང་ཕྱུར་ 1.133 ཡོད་པ་དང་། ཡོ་རོབ་ཀྱི་ TikTok སྤྱོད་མཁན་དུང་ཕྱུར་ 1.5 ཙམ་ཡོད། འོན་ཀྱང་དོན་དངོས་ཐོག་རྒྱ་ནག་གི་འཕྲུལ་རིགས་ཀུང་སི་ཆེན་པོ་འདི་དག་གི་འཛམ་གླིང་ཡོངས་ལ་བཟོད་སྒོམ་བྱེད་ཐབས་བྲལ་བའི་སྒོ་ནས་སྤྱོད་མཁན་གྱི་གཞི་གྲངས་ཇི་ལྟར་ཐག་གཅོད་བྱེད་སྟངས་དང་། སྤྱོད་མཁན་འདི་དག་གི་གཞི་གྲངས་རྒྱུད་འཛམ་གླིང་རྒྱལ་ཁབ་མང་པོ་ལ་རྒྱལ་ཁབ་ཀྱི་བདེ་འཇགས་ལ་མཉེན་ཁ་བྱུང་སྲིད་པའི་ཉེས་འཛུས་ཡང་ཡོང་གི་ཡོད། རྒྱ་ནག་གི་འཕྲུལ་རིགས་ཀུང་སི་ཆེན་པོ་དང་དེའི་སྤྱོད་མཁན་གྱིས་ཞིས་ཅིན་ཕིང་གི་དུས་རབས་སུ་ལག་བསྟར་བྱས་པའི་གཞི་གྲངས་དང་དྲ་རྒྱའི་བདེ་འཇགས་བཅའ་ཁྲིམས་དང་ཁྲིམས་སྲོལ་རྣམས་ལ་བརྩི་སྲུང་ཞུ་དགོས། དཔེར་ན། རྒྱ་ནག་གི་གཞི་གྲངས་གསང་བའི་བཅའ་ཁྲིམས་ཀྱི་གཏན་འབེབས་ལྟར་ན། སྤྱོད་མཁན་གྱི་གཞི་གྲངས་འཚོལ་སྡུད་བྱེད་པ་རྣམས་་སྲིད་གཞུང་ལ་མཉམ་སྤྱོད་བྱེད་དགོས་པ་དང་། རྒྱ་ནག་གི་སྤྱི་ཚོགས་ཀྱི་མཉེན་ཆས་ཆེ་གྲས་ TikTok ཡིས་སྤྱོད་མཁན་གྱི་མིང་དང་། དགའ་ཕྱོགས། གནས་ཡུལ་གྱི་གཞི་གྲངས། སྒྲ་སྐྱེད་དང་པར་ཆས་ཀྱིས་ཟིན་བྲིས་བཅས་གཞི་གྲངས་འཚོལ་སྡུད་བྱེད་མུད་ཡིན། རྒྱལ་ཁབ་མང་པོ་ཞིག་གིས་ཁོ་ཚོའི་སྲིད་གཞུང་གི་དཔོན་རིགས་དང་ལས་བྱེད་རྣམས་ཀྱི་སྒྲིག་ཆས་ཁྲོད་དུ་ TikTok ལ་འབྲེལ་མཐུད་བྱེད་པའི་ཉེན་ཁ་ཡོད་པར་བསམ་གཞིགས་བྱེད་བཞིན་ཡོད། TikTok ཡི་ཁྱིམ་བདག་ཀུང་སིས་རྒྱ་ནག་གཞི་གྲངས་བདེ་འཇགས་བཅའ་ཁྲིམས་ལ་བརྩི་སྲུང་ཞུ་ཡི་ཡོད་སྟབས། རྒྱལ་ཁབ་མང་པོ་ཞིག་གིས་དྲ་རྒྱའི་བདེ་འཇགས་ལ་མུ་མཐུད་ནས་ཤུགས་རྐྱེན་ཐེབས་པར་བསམ་གཞིགས་བྱེད་བཞིན་ཡོད།
ཡོ་རོབ་མནའ་འབྲེལ་ཨུ་ཡོན་ལྷན་ཁང་ནི་ཡོ་རོབ་མནའ་འབྲེལ་གྱིས་ཁྲིམས་འཛུགས་དང་ལག་བསྟར་གྱི་འགན་འཁུར་བ་དང་ཡོ་རོབ་མནའ་འབྲེལ་གྱི་སྔོན་རྩིས་ལག་བསྟར་བྱེད་པའི་ཞིག་ལས་ཁུངས་ཡིན། དེའི་ནང་དུ་གཏན་འཇགས་ལས་བྱེད་དང་གན་རྒྱ་འཇོག་པའི་ལས་བྱེད་མཁྱོན་སྡོམ། ༣༢༠༠༠ ཡོད། ༢༠༢༣ ལོའི་ཟླ་ ༢ ཚེས་ ༢༣ ཉིན་ཡོ་རོབ་མནའ་འབྲེལ་ཨུ་ཡོན་ལྷན་ཁང་གིས་དྲ་རྒྱའི་བདེ་འཇགས་ཀྱི་གནད་དོན་དང་དེ་བས་ཞིབ་ཕྲའི་སྒོ་ནས་སྤྱོད་མཁན་གྱི་གཞི་གྲངས་ཐག་གཅོད་བྱེད་པ་རྒྱུད། TikTok བཀག་སྡོམ་བྱེད་ཡོད། བཀག་སྡོམ་འདིའི་རྒྱུད་ལས་བྱེད་རྣམས་ཀྱི་གཞུང་ཕྱོགས་ཀྱི་ཉེར་སྤྱོད་སྒྲིག་སྦྱོར་བྱས་པའི་མི་སྒེར་གྱི་སྒྲིག་ཆས་སྟེང་ TikTok བཀོལ་སྤྱོད་བྱེད་མི་ཐུབ། ཡོ་རོབ་མནའ་འབྲེལ་གྱི་མགྲིན་ཚབ་པ་ Sonya Gospodinova ཡིས་བཤད་རྒྱུར། “ཡོ་རོབ་མནའ་འབྲེལ་ཨུ་ཡོན་ལྷན་ཁང་གི་བདེ་འཇགས་ཀྱི་རྒྱུ་རྐྱེན་ཐོག་ནས་ཐག་གཅོད་བྱས་པ་རེད། “ཁོ་མོས་འགྲེལ་བརྗོད་གནང་སྐབས། “བྱེད་ཐབས་འདིའི་དམིགས་ཡུལ་ནི་ཨུ་ཡོན་ལྷན་ཁང་གི་ཁོར་ཡུག་ལ་དྲ་རྒྱའི་འཇབ་རྒོལ་ནས་སྲུང་སྐྱོབས། དྲ་རྒྱའི་བདེ་འཇགས་ཀྱི་འཇིགས་སྐུལ་དང་བྱ་སྤྱོད་ལ་སྲུང་སྐྱོབ་བྱེད་རྒྱུའི་ཆེད་དུ་ཡིན།” ཁོང་གིས་ད་དུང་བཀག་སྡོམ་འདི་ནི་”གནས་སྐབས་”དང་”རྒྱུན་ཆད་མེད་པར་ཞིབ་བཤེར་དང་ཡང་བསྐྱར་དཔྱད་ཞིབ་བྱ་རྒྱུ་ཡིན་”ཅེས་བཤད་འདུག། གྲོས་ཚོགས་ཀྱིས་ངོ་ནས་ ༢༠༢༣ ལོའི་ཟླ་ ༣ ཚེས་ ༢༠ ཉིན་ནས་བཟུང་ཁོ་ཚོའི་གཞུང་ཕྱོགས་ཀྱི་སྒྲིག་ཆས་ཐོག། TikTok བཀོལ་སྤྱོད་བྱེད་བཀག་སྡོམ་བྱེད་ཡོད་མོད། འོན་ཀྱང་ཁོང་ཚོས་ད་དུང་ལས་བྱེད་སྒེར་གྱི་སྒྲིག་ཆས་ནང་ནས་ཀྱང་། TikTok བཀོལ་སྤྱོད་མེད་པ་བཟོ་དགོས་པའི་སློབ་སྟོན་གནང་ཡོད། United States, Canada, United Kingdom, Taiwan, Denmark དང། Belgium བཅས་ཚུད་པའི་རྒྱལ་ཁབ་གཞན་དག་མང་པོར་སྲིད་གཞུང་གི་ལག་ཁྱེར་ཁ་པར་ཐོག་ནས་ TikTok བེད་སྤྱོད་བྱེད་པར་བཀག་སྡོམ་བྱས་ཡོད། ༢༠༢༠ ལོར་རྒྱ་གར་གྱི་རྒྱལ་ཁབ་བདེ་འཇགས་ལ་འཇིགས་སྣང་སྐུལ་བར་སེམས་ཁུར་བྱེད་པའི་རྐྱེན་གྱིས་རྒྱ་གར་ཡོངས་ལ་བཀག་སྡོམ་བྱས་པ་རེད། ༢༠༢༢ ལོའི་ཟླ་ ༤ པའི་ནང་། Afghanistan སོགས་ཨེ་ཤ་ཡའི་རྒྱལ་ཁབ་གཞན་དག་གིས་ TikTok བཀག་སྡོམ་བྱས་པ་དང་དུས་མཚུངས་སུ་ Pakistan གྱིས་ཀྱང་ ༢༠༢༠ ནང་ཐེངས་མང་པོར་གནས་སྐབས་བཀག་སྡོམ་བྱས་ཡོད།
དྲ་རྒྱའི་བདེ་འཇགས་ལ་སེམས་ཁུར་བྱེད་པ་ཕུད། TikTok ཡིས་རྒྱ་ནག་གི་མཚམས་སྦྱོར་བཅའ་ཁྲིམས་ལ་བརྩི་སྲུང་ཞུ་དགོས་ལ་སྟེགས་བུ་འདི་ནང་གི་ནང་དོན་རྣམས་ལ་མཐའ་གཉིས་ཀར་མ་ལྷུང་བྱ་རྒྱུ་ནི་ཀུང་སི་ཆེན་པོ་འདི་དག་གི་འགན་ཡིན། མདོར་བསྡུས་ན། TikTok ཡིས་ད་དུང་དྲ་སྦྲེལ་རང་དབང་ལ་རྒྱབ་སྐྱོར་བྱེད་མི་ཐུབ་ཞིང་རྒྱ་ནག་དང་འབྲེལ་བ་ཡོད་པའི་ས་ཁམས་ཆབ་སྲིད་དང་འགྲོ་བ་མིའི་ཐོབ་ཐང་གི་གནད་དོན་སྐོར་གྱི་དོན་དངོས་དང་། བསམ་བློ། འདུ་ཤེས་འཛིན་སྟངས། བསམ་འཆར་བཅས་བརྗེ་ལེན་ཆོག་པའི་སྟེགས་བུ་ཡང་བསྐྲུན་ཐུབ་མེད། TikTok ནི་རྒྱ་ནག་དམར་ཤོག་གི་སྲིད་དབང་ལ་ཚོར་བ་རྣོན་པོ་དང་ཁ་སྐྱེངས་དགོས་བའི་ནང་དོན་ལ་ཞིབ་བཤེར་བྱེད་བཞིན་ཡོད་པ་ཤེས་ཤིང་། སྐབས་འགར་བརྙན་ཕབ་དེ་བརྡ་ཁྱབ་ཁོ་ནར་མ་གཏོགས་མཐོང་མི་ཐུབ་པའམ་ཡང་ན་”འོས་སྦྱོར་བྱས་མེད། “བཅས་ཀྱི་སྤྱོད་རྒྱུ་ལའང་ཁག་པོ་བཟོ་ཡོད། འོན་ཀྱང་རྒྱ་ནག་གི་ཕྱི་རྒྱལ་ཁབ་མང་པོའི་ནང་བོད་དང་རྒྱ་ནག་གི་ནང་ TikTok ནང་དོན་བཀག་སྡོམ་བྱེད་པ་རྣམས་ནང་དོན་ཞིབ་བཤེར་བྱེད་ཞིང་སྤྱོད་མཁན་གྱིས་རྨང་གཞི་བྱས་པའི་ཁོངས་གཏོགས་ཁུལ་དུ་ཁྲིམས་མཐུན་ཆ་ནས་སྤྱོད་ཆོག་པ་རེད། རྒྱ་ནག་གི་ཞིབ་བཤེར་དེ་རྒྱལ་མཚམས་ལས་བརྒལ་ཏེ་རང་དབང་གི་སྤྱི་ཚོགས་སུ་སླེབས་པར་ཤུགས་རྐྱེན་ཚབས་ཆེན་ཐེབས་སྲིད་ཞིང་ ཞིབ་བཤེར་བྱ་ཡུལ་གྱི་ཆ་འཕྲིན་དེ་དག་ལ་རྩོད་གླེང་ཧ་ཅང་ཆེན་པོ་ཡོད་པའི་གནད་དོན་དཔེར་ན། The Tiananmen Square Massacre དང་། བོད་རང་བཙན། Falun Gong ཆོས་ལུགས་ཚོགས་པ། Hong Kong ནང་གི་རྒྱ་ཁྱབ་ཏུ་དྲིལ་བསྒྲགས་བྱེད་པའི་དམངས་གཙོའི་རྒོལ་གཏམ་བྱ་འགུལ། རྒྱ་ནག་གི་སྲིད་གཞུང་གི་ཡུ་གུར་ཁ་ཆེ་དང་ལྷོ་ཕྱོགས་སོག་ཡུལ་མི་རིགས་ལ་བཙན་ཤེད་ཀྱིས་སྐྱོན་བརྗོད་མང་པོ་བྱས་ཡོད། རྒྱ་ནག་ནང་ཁུལ་ Douyin (TikTok ཡི་ཁྱིམ་བདག་ཀུང་སི་གཅིག་གིས་བརྙན་འཕྲིན་གཙོ་གཉེར་བྱེད་པའི་ཞབས་ཞུ་ཞིག་ཡིན།) ནི་རྒྱ་ནག་ནང་སྤྱོད་ཆོག་ལ་ TikTok དང་བཀོལ་ཆས་མི་འདྲ་བ་ཡིན་པས། འདི་གཉིས་ཀྱི་ཉེར་སྤྱོད་གོ་རིམ་ཁྲོད་དུ་སྤྱོད་མཁན་ཕན་ཚུན་འགྲོ་འོང་བྱེད་ཐབས་བྲལ་བ་རེད།
འཛམ་གླིང་ཡོངས་ཀྱི་དྲ་སྦྲེལ་སྤྱོད་མཁན་མི་ཉུང་བ་ཞིག་གིས་སྤྱི་ཚོགས་དྲ་རྒྱ་དང་འཕྲིན་སྐྱེལ་ཉེར་སྤྱོད་གཞན་དག་ལ་བརྟེན་དྲགས་པའི་དུས་རབས་འདིར་འཕྲུལ་རིགས་བདེ་འཇགས་ཀྱི་རྙོག་དྲ་ལ་དོ་སྣང་དགོས། དཔེར་ན། TikTok སོགས་ཉེར་སྤྱོད་གོ་རིམ་ནི་དབྱིངས་ཞུགས་པའི་རྩིས་རྒྱག་ཐབས་སྤྱད་ནས་གསར་སྤེལ་བྱས་པ་དང་། ཐོ་ཁོངས་ཐོ་འགོད་བྱེད་སྐབས་ང་ཚོའི་མིང་དང་། ཁ་པར་ཨང་གྲངས། གློག་རྡུལ་ཡིག་ཟམ་སོགས་སྤྱོད་མཁན་གྱི་ཆ་འཕྲིན་མང་པོ་ཞིག་སྤྲད་དགོས་ཀྱི་ཡོད་པ་རེད། སྟེགས་བུ་འདི་དག་གིས་དྲ་ཐོག་ནས་ང་ཚོར་རིན་མེད་ཞབས་ཞུ་མཁོ་འདོན་བྱས་ཡོད་མོད། འོན་ཀྱང་ཁོ་ཚོས་ང་རང་ཚོའི་མི་སྒེར་གྱི་གཞི་གྲངས་དང་དྲ་ཐོག་གི་བྱེད་སྒོའི་རྐང་རྗེས་རྒྱུད་ཁེ་སང་བཟོད་བཞིན་པ་རེད། རྒྱ་ནག་གི་ཉེར་སྤྱོད་གོ་རིམ་དཔེར་ན་TikTok དང་། WeChat སོགས་རྒྱལ་སྤྱིའི་ཁྱབ་ཁོངས་སུ་བདེ་འཇགས་ཀྱི་མཉེན་ཁ་ཡོད་པ་མང་པོའི་སྐྱོན་བརྗོད་བྱེད་ཀྱི་ཡོད། དེའི་སྤྱོད་མཁན་གྱི་མི་སྒེར་གྱི་གཞི་གྲངས་དང་དྲ་ཐོག་གི་བྱེད་སྒོ་སྤེལ་ཚུལ་གྱི་ཐབས་བྱུས་ལག་ལེན་ལ་གཞིགས་ནས་ཉེར་སྤྱོད་གོ་རིམ་འདི་དག་ལ་ཞིབ་ཅིང་ཕྲ་བའི་ལྟ་སྐུལ་ཚོད་འཛིན་དང་ཞིབ་བཤེར་བྱེད་ཐབས་ཀྱི་སྲིད་བྱུས་ཡོད་པ་སྟོན་ཡོད། རྒྱ་ནག་གི་ཉེར་སྤྱོད་གོ་རིམ་འདི་དག་གི་ཁྱིམ་བདག་ཀུང་སིས་ངེས་པར་དུ་སྲིད་དབང་གི་བཅའ་ཁྲིམས་དང་སྲིད་ཇུས་ལ་བརྩི་སྲུང་ཞུ་དགོས་པའི་རྒྱ་ནག་གི་དབང་འཛིན་ལས་ཁུངས་ཀྱིས་ཀྱང་ཚོད་འཛིན་བྱས་ཆོག་ལ། རྩོད་གཞི་ཡོད་པའི་ཉེར་སྤྱོད་གོ་རིམ་འདི་དག་ལ་མཁོ་བའི་སྒྲིག་ཆས་ཀྱི་ཆོག་མཆན་ནང་སྒྲ་སྐྱེད་དང་། པར་ཆས། གནས་ཡུལ། གསོག་ཉར་སོགས་ཚུད་ཡོད། ཆ་འཕྲིན་འཁོར་རྒྱུག་བཞིན་པའི་ས་ཁུལ་འདི་དག་ནང་ལྟ་སྐུལ་ཚོད་འཛིན་དང་ཞིབ་བཤེར་བྱ་རྒྱུ་གཏན་འཁེལ་བྱས་ཡོད། དེར་བརྟེན་ང་ཚོ་མི་སྒེར་དང་། རྩ་འཛུགས། རྒྱལ་ཁབ་བཅས་ཀྱི་སོ་སོའི་ངོ་བོའི་ཆ་ནས་ང་ཚོའི་དྲ་ཐོག་གི་གསང་དོན་དང་བདེ་འཇགས་ཀྱི་ཆེད་དུ་ཉེར་སྤྱོད་དེ་རིགས་བེད་སྤྱོད་མི་བྱེད་པ་ནི་ཧ་ཅང་གལ་འགངས་ཆེ་བ་ཞིག་རེད། ང་ཚོས་ངེས་པར་དུ་སྤྱོད་མཁན་གྱི་གསང་དོན་དང་བདེ་འཇགས་ཀྱི་ཆེད་ཆུ་ཚད་འདང་ངེས་ཤེས་པའི་བདེ་འཇགས་སྟེགས་བུ་གཞན་རྣམས་ཚབ་བྱེད་ནས་སྤྱོད་དགོས། Youtube, Facebook, Instagram དང་། Triller སོགས་སྤྱི་ཚོགས་ཀྱི་དྲ་རྒྱའི་ཉེར་སྤྱོད་གོ་རིམ་དེ་ TikTok ལས་ཅུང་བདེ་འཇགས་ལྡན་ལ། Signal, Wire, Element དང་། WhatsApp བཅས་ཀྱང་། WeChat ལས་ཀྱང་བདེ་འཇགས་ལྡན་ཡོད།
གཤམ་ལ་ང་ཚོའི་སྒྲིག་ཆས་ཁྲོད་དུ་དྲ་ཐོག་གི་རྣམ་པ་སྲུང་སྐྱོབ་བྱེད་པའི་གནད་འགག་གི་གྲོས་འགོ་ཁག་འཁོད་ཡོད།
- ཉེར་སྤྱོད་བདེ་འཇགས།
- གལ་ཏེ་ཁྱེད་ལ་དགོས་མཁོ་མེད་ཚེ། སྒྲིག་སྦྱོར་མ་བྱེད། ཉེར་སྤྱོད་གོ་རིམ་ཡོད་ཚེ་སྒྲིག་སྦྱོར་བྱེད་པར་བཀག་འགོག་བྱས་ན། རྒྱུས་མེད་པ་དང་གཞུང་འབྲེལ་མ་ཡིན་པའི་ཉེར་སྤྱོད་གོ་རིམ་དང་འབྲེལ་བ་ཡོད་པའི་རྙོག་འཛིང་རང་བཞིན་དང་ཉམས་ཞན་རང་བཞིན་ཇེ་ཆུང་གཏོང་ཐུབ།
- ངེས་པར་དུ་སྒྲིག་སྦྱོར་མ་གནང་གོང་། ཉེར་སྤྱོད་གོ་རིམ་གྱི་ཆོག་མཆན་ལ་དོ་དམ་བྱེད་དགོས། ཉེར་སྤྱོད་ཆོག་མཆན་ལ་དོ་དམ་བྱ་རྒྱུ་ནི་གལ་འགངས་ཤིན་ཏུ་ཆེ་བ་ཞིག་ཡིན་པས། ང་ཚོའི་སྒྲིག་ཆས་དང་གཞི་གྲངས་ཀྱི་གནོད་ཚེ་རྣམས་ངན་སེམས་བཅངས་པའི་ཉེར་སྤྱོད་རྣམས་སྔོན་འགོག་བྱེད་ཐུབ།
- གསང་སྡོམ། དྲ་སྦྲེལ་གྱིས་ཉེར་སྤྱོད་གོ་རིམ་ནི་རྒྱུན་དུ་ཞབས་ཞུ་ཡོ་བྱད་དང་འབྲེལ་ནས་ཞབས་ཞུ་འདོན་སྤྲོད་བྱེད་པ་དང་། བདེ་འཇགས་ཀྱི་གསང་བའི་ལག་རྩལ་ལས་གྲུབ་པའི་ཉེར་སྤྱོད་གོ་རིམ་རྒྱུད་གཞི་གྲངས་ལ་གསང་སྡོམ་བརྒྱབ་ནས་སྤྱོད་མཁན་གྱི་བདེ་འཇགས་དང་གསང་དོན་སྲུང་སྐྱོབས་བྱེད་ཀྱི་ཡོད།
- ཉེར་སྤྱོད་གོ་རིམ་འདི་སུ་ལ་དབང་བ་ཡིན། ང་ཚོ་འཇིག་རྟེན་འདིའི་སྟེང་གི་སྡོད་གནས་ལ་གཞིགས་ནས་ངེས་པར་དུ་ཀུང་སིའམ་ཡང་ན་ཉེར་སྤྱོད་གོ་རིམ་གཉེར་སྐྱོང་བྱེད་མཁན་མི་སྒེར་གྱིས་ང་ཚོས་གཡོལ་འདོད་པའི་སྲིད་གཞུང་ཁ་ཤས་ལ་རང་མོས་དང་བཙན་ཤེད་ཀྱི་འོས་འགན་ཡོད་མེད་ལ་བལྟ་དགོས། ཁོ་ཚོར་སྤྱོད་མཁན་གྱི་གཞི་གྲངས་རྣམས་སྲིད་གཞུང་གང་རུང་ཞིག་དང་ལྷག་པར་དུ་སྤྱི་ཚོགས་རིང་ལུགས་སམ་ཆབ་སྲིད་རིང་ལུགས་ནང་ཞུགས་མཁན་རྣམས་ལ་རྩིས་སྤྲོད་བྱེད་པའི་ལོ་རྒྱུས་ཡོད་མེད་རྩད་གཅོད་བྱ་རྒྱུ་ནི་གལ་འགང་ཆེ།
- ཞབས་ཞུའི་ཡོ་བྱད་ཀྱི་གནས་ཡུལ། ང་ཚོས་ཉེར་སྤྱོད་གོ་རིམ་ཁྲོད་ཐོ་འགོད་བྱེད་སྐབས་འདོན་སྤྲོད་བྱས་པའི་མི་སྒེར་གྱི་གཞི་གྲངས་མང་ཆེ་བ་ཉེར་སྤྱོད་ཞབས་ཞུའི་ཡོ་བྱད་ནང་ཉར་ཚགས་བྱས་ཡོད། གལ་ཏེ་ཉེར་སྤྱོད་གོ་རིམ་འདིའི་གཞི་གྲངས་ཞབས་ཞུའི་ཡོ་བྱད་དེ་སྲིད་དབང་སྒེར་གཅོད་ས་ཁུལ་དུ་གནས་ཡོད་ན། རྒྱལ་ཁབ་ཀྱི་བདེ་འཇགས་ལ་འཇིགས་སྣང་བཟོ་བ་རེད།།
- བེད་མེད་སྡེབ་གསོག་མ་བྱེད། ང་ཚོའི་སྒྲིག་ཆས་ནང་གི་ཚོར་བ་སྐྱེན་པའི་ཆ་འཕྲིན་གཙང་བཤེར་གང་ཐུབ་བྱས་ཏེ་ཞིབ་དཔྱོད་དཔོན་གྱི་ཁུངས་འདེད་རང་བཞིན་དང་འགན་འཁྲི་ལམ་ལུགས་ལ་ནམ་ཡང་དང་ལེན་མི་ཞུ།། སྒྲིག་ཆས་ནང་གི་ཚོར་བ་སྐྱེན་པའི་གཞི་གྲངས་གསོག་འཇོག་བྱས་ནས་དུས་ཡུན་ཅུང་རིང་པོ་ཞིག་འགོར་རྗེས་དེའི་སྤྱོད་མཁན་འཛིན་བཟུང་དང་ཉེས་དོན་ཉེས་ཆད་གཅོད་རྒྱུར་ཉེན་ཁ་བཟོ་སྲིད།
- VPNs སོགས་གཡོལ་ཐབས་ཡོ་བྱད་བེད་སྤྱོད་བྱས་ན། ང་ཚོས་དུས་རྒྱུན་འབྲེལ་གཏུག་ཁྲོད་དུ་ཡིད་རྟོན་རུང་བའི་ VPN བཀོལ་སྤྱོད་བྱས་ན་རང་ཉིད་ཀྱི་ངོ་བོ་སྦས་སྐུང་བྱེད་ཀྱི་ཡོད། VPN ཀྱི་རྒྱུད་འབྲེལ་གཏུགས་ལ་ལྟ་ཞིབ་ཚད་ལེན་བྱེད་པའི་དབང་འཛིན་ལས་ཁུངས་འདི་དག་ལས་ཁུངས་འདེད་རང་བཞིན་ནས་སྐྱོབས།
- ཁྱོད་ཀྱི་སྒྲིག་ཆས་གསར་མནོོན་བྱོས། ང་ཚོའི་སྒྲིག་ཆས་ཀྱི་མཉེན་ཆས་དང་བཀོལ་སྤྱོད་མ་ལག་གསར་མནོན་ཡང་ན་ནུས་ཤུགས་ཡོད་རྒུ་བཏོན་ནས་སྒྲིག་སྦྱོར་བྱས་ནས་ཉུལ་ཆས་དང་སྐྱོན་གཏོང་མཉེན་ཆས་རྙིང་པ་ནས་སྲུང་སྐྱོབ་བྱེད་ཐུབ་པར་ང་ཚོས་ཡིད་ཆེས་བྱེད་ཀྱི་ཡོད།
- བདེ་འཇགས་ཀྱི་འཕྲིན་སྐྱེལ་སྟེགས་བུ་འདེམས། སྲིད་དབང་སྒེར་གཅོད་ལམ་ལུགས་ཀྱིས་བརྗེ་རེས་བྱེད་བཞིན་པའི་ཆ་འཕྲིན་ལ་ཚོར་བ་རྣོན་པོའམ་ཡང་ན་”ངོས་འཛིན་”བྱེད་སྐབས་བདེ་འཇགས་ཀྱི་འཕྲིན་སྐྱེལ་ཉེར་སྤྱོད་གོ་རིམ་སྤྱོད་རྒྱུ་ནི་ཧ་ཅང་གལ་འགངས་ཆེ།