རྒྱ་ནག་གི་དྲ་རྒྱའི་ཁ་བྱང་གསར་པའི་འཆར་གཞི། སྤྱོད་མཁན་གྱི་གསང་དོན་དང་དྲ་ཐོག་མིང་མེད་རང་བཞིན་ཐོག་རེ་བ་བརླག་པ་ཡིན་ནམ།

འཕྲུལ་རིག་ལག་རྩལ་ནི་ཕན་ཐོགས་ཆེ་བའི་གཡོག་པོ་ཞིག་ཡིན་མོད། འོན་ཀྱང་ཉེན་ཁ་ཅན་གྱི་དབང་འཛིན་པ་ཞིག་ཀྱང་ཡིན།

~ ཁི་རི་སི་ཊན་ལོ་འུ་སི་ལང་གེ

རྒྱལ་ཁབ་སོ་སོའི་ཁེ་ཕན་སྣ་ཚོགས་དང་འཕྲུལ་རིག་གསར་བརྗེའི་དུས་རབས་འདིར། རྒྱ་ནག་གི་དམར་ཤོག་སྲིད་གཞུང་གིས་གཞུང་འབངས་དང་གྲངས་ཉུང་མི་རིགས་ཀྱི་ཐོབ་ཐང་ལ་དམ་བསྒྲགས་དང་། ལྟ་ལྐུལ་ཚོད་འཛིན། གནོན་ཤུགས་སྤྲོད་པར་འཕྲུལ་རིག་ལག་རྩལ་བེད་སྤྱོད་བརྒྱུད་སྣེ་ཁྲིད་མཁན་ཞིག་ཆགས་ཡོད། རྒྱ་ནག་དམར་ཤོག་གིས་ཁོ་ཚོའི་ས་ཁམས་ཆབ་སྲིད་ཀྱི་དམིགས་ཡུལ་སྲུང་སྐྱོབ་དང་འཕྲུལ་རིག་དབང་འཛིན་ཐོག་འབད་བརྩོན་བྱེད་པར་དཀའ་རྙོག་ཅན་གྱི་བཀག་སྡོམ་དང་ཞིབ་བཤེར་ཐབས་བྱུས་རྣམས་ཉིན་རེའི་ལས་ཀ་ལྟ་བུར་གྱུར་ཡོད།

ཕྱི་ལོ་ ༢༠༡༢ ལོར། རྒྱ་ནག་རྒྱལ་ཡོངས་མི་དམངས་འཐུས་མི་ཚོགས་ཆེན་རྒྱུན་ལས་ལྷན་ཁང་གིས་༼ དྲ་རྒྱའི་གནས་ཚུལ་སྲུང་སྐྱོབ་ཇེ་ཆེར། ༽ཞེས་པའི་རྒྱལ་ཡོངས་ལས་འགུལ་འདི་ནས་༼ མིང་དངོས་ཐོ་འགོད་མ་ལག ༽ཁྱབ་འཕེལ་བྱ་རྒྱུའི་ཐག་གཅོད་བྱས་ཡོད། མ་ལག་འདིའི་བརྒྱུད། རྒྱ་ནག་གི་དྲ་རྒྱ་ཞབས་ཞུ་དང་ནང་དོན་མཁོ་སྤྲོད་བྱེད་མཁན་ཚོས་སྤྱོད་མཁན་གྱི་མིང་དངོས་དང་། ཁ་བྱང་ལག་ཁྱེར་ཨང་གྲངས། གནས་ཚུལ་གཞན་དག་བསྡུ་རུབ་བྱེད་དགོས་པ་གསལ་འདུག ཕྱི་ལོ་ ༢༠༡༧ ལོར། རྒྱ་ནག་གི་དྲ་རྒྱའི་བར་སྣང་བདག་སྐྱོང་ལྷན་ཁང་གིས་དྲ་རྒྱ་ཞབས་ཞུ་ཚང་མའི་ཐོག་ཏུ་མིང་དངོས་ཐོ་འགོད་བྱེད་དགོས་པ་དྲ་རྒྱའི་བདེ་འཇགས་ཁྲིམས་གསར་པ་ལག་བསྟར་བྱས་ཡོད། ཁྲིམས་འདིས་དྲ་རྒྱ་བེད་སྤྱོད་བྱེད་མཁན་ཚོའི་མིང་མེད་རང་བཞིན་མེད་པ་བཟོས་པ་དང་ཆབས་ཅིག་གཞུང་གྱི་ཁོ་ཚོར་ལྟ་ལྐུལ་ཚོད་འཛིན་དང་། དམ་བསྒྲགས། གནོན་ཤུགས་སྤྲོད་པའི་དབང་ཆ་སྤྲད་ཡོད། སྤྱིར་སྟངས་བྱས་ན་དྲ་རྒྱ་ནི་རྒྱུ་མཚན་ཡང་དག་ཐོག་ནས་འཛམ་གླིང་ཡོངས་སུ་གསང་དོན་ལ་བརྩི་བཀུར་ཆེ་བའི་བར་སྣང་ཞིག་ཏུ་འཕེལ་རྒྱས་བྱུང་ཡོད་ནའང་། དེ་ལྟ་བུའི་ཁྲིམས་ཀྱིས་རྒྱ་ནག་ནང་ཉེས་ཆད་ལ་འཇིགས་ནས་དྲ་རྒྱ་བེད་སྤྱོད་བྱེད་མཁན་དང་ཞབས་ཞུ་མཁོ་སྤྲོད་བྱེད་མཁན་གྱི་རང་དབང་ལ་ཚོད་འཛིན་བྱེད་བཞིན་ཡོད།

ཕྱི་ལོ་ ༢༠༢༤ ལོའི་ཟླ་ ༧ ཚེས་ ༢༦ ཉིན། རྒྱ་ནག་མང་ཚོགས་བདེ་འཇགས་ལྷན་ཁང་དང་དྲ་རྒྱའི་བར་སྣང་བདག་སྐྱོང་ལྷན་ཁང་གཉིས་ཀྱི་རྒྱལ་ཡོངས་དྲ་རྒྱའི་ཁ་བྱང་ལག་ཁྱེར་སྤེལ་རྒྱུའི་འཆར་གཞི་བཏོན་ཡོད། ༼ སྒེར་གྱི་གནས་ཚུལ་སྲུང་སྐྱོབ་ཇེ་ཆེར་གཏོང་རྒྱུ། ༽ ཞེས་པའི་རྒྱུ་མཚན་ཞིག་གི་འོག འཆར་གཞི་འདིས་དྲ་རྒྱའི་སྟེགས་བུ་དང་ཚོང་ལས་སྒྲིག་འཛུགས་གཞན་ནང་སྔོན་ཡོད་མིང་དངོས་ཐོ་འགོད་མ་ལག་ཐོག་བེད་སྤྱོད་ལོག་པ་བྱ་རྒྱུ་འགོག་ཐབས་བྱས་ཏེ། སྒེར་གྱི་གསང་དོན་ལ་སེམས་ཁྲལ་དང་གནས་ཚུལ་ཕྱིར་ཤོར་གྱི་ཉེན་ཁ་ཆུང་དུ་གཏོང་རྒྱུ་ཡིན་པ་བཤད་ཡོད།དྲ་རྒྱའི་ཁ་བྱང་ལག་ཁྱེར་གསར་པ་འདི་སྤྱོད་མཁན་ཚོར་དྲ་རྒྱའི་སྟེང་དུ་ཐོ་འགོད་བྱེད་སྐབས་མིང་དངོས་དང་ཁ་པར་ཨང་གྲངས་ཚབ་ཏུ་རང་བཞིན་ཅན་གྱི་དྲ་ཐོག་ཁ་བྱང་གི་བྱ་ཐབས་གསར་པ་ཞིག་ཡིན་པར་བཤད་འདུག མ་ཟད་ད་ལྟའི་འཆར་གཞི་འདིའི་ཐད་མང་ཚོགས་ཀྱི་དགོངས་འཆར་བསྡུ་ལེན་བྱེད་བཞིན་ཡོད་པ་དང་། ཟླ་ ༨ ཚེས་ ༢༥ བར་དུ་དགོངས་འཆར་འབུལ་ཆོག་པ་གསལ་ཡོད། དྲ་རྒྱའི་ཁ་བྱང་ལག་ཁྱེར་ཐོབ་འདོད་ཡོད་མཁན་ཚོས་མང་ཚོགས་བདེ་འཇགས་ལྷན་ཁང་གིས་གསར་བཟོ་བྱས་པའི་རྒྱལ་ཡོངས་དྲ་རྒྱ་ཁ་བྱང་ཚོད་ལྟ་མཉེན་ཆས་བརྒྱུད་ནས་སྙན་ཞུ་འབུལ་ཆོག་པ་དང་། པེ་ཅིན་དུ་གཏན་གཞིར་བྱེད་པའི་རྒྱ་ནག་གི་བརྒྱུད་ལམ་ཚོགས་པ་ཅི་ཨ་ཞིན་རྒྱལ་སྤྱིའི་སྙན་ཐོ་ལྟར་ན། ཐོ་འགོད་བྱེད་སྐབས་རྒྱལ་ཁབ་ཀྱི་ཁ་བྱང་ལག་ཁྱེར་དང་གང་ཟག་དོ་བདག་གི་ངོ་གདོང་གཅིག་མཚུངས་ཀྱི་རྒྱུད་རིམ་ཁ་ཤས་ཀྱི་ར་སྤྲོད་བྱེད་དགོས་ཀྱིས་ཡོད། ཁ་པར་ལ་རྟགས་དཔྱད་བྱས་རྗེས་གསང་ཚིགས་གསར་པ་བཟོས་ཚར་ན། དྲ་ཐོག་ཨང་གྲངས་དང་དྲ་རྒྱའི་ལག་ཁྱེར་སྤྲོད་ཀྱིས་ཡོད། ཐོག་མའི་འཛུལ་ཞུགས་མཁན་དང་དགོངས་འཆར་བསྡུ་ལེན་གྱི་དུས་རིམ་ནང་། སྤྱོད་མཁན་ཚོས་མི་དམངས་ཞབས་ཞུའི་སྟེགས་བུ་བཅུ་དང་ཚོང་ལས་དྲ་རྒྱའི་ཉེར་སྤྱོད་མ་ལག་ ༧༡ བཅས་ཁྱོན་དྲ་རྒྱའི་ཉེར་སྤྱོད་མ་ལག་ ༨༡ གི་སྟེང་དུ་དྲ་རྒྱའི་ཁ་བྱང་ལག་ཁྱེར་ཚོད་ལྟ་བྱེད་ཆོག རྒྱ་ནག་གི་དྲ་རྒྱའི་ཉེར་སྤྱོད་མ་ལག་གྲགས་ཅན་དཔེར་ན། WeChat དང་། དྲ་ཐོག་ཉོ་ཚོང་ཞབས་ཞུ་ Taobao དང་། དྲ་ཐོག་ལས་མི་འཚོལ་སྒྲུབ་སྟེགས་བུ་ Zhaopin བཅས་ནང་ལག་ཁྱེར་ཚོད་བལྟ་བྱེད་ཐུབ།

རྒྱ་ནག་གཞུང་གིས་དྲ་རྒྱ་སྤྱོད་མཁན་གྱི་སྒེར་གྱི་གནས་ཚུལ་རྣམས་ཚོང་ལས་སྡེ་ཁག་ལས་སྲུང་སྐྱོབ་བྱེད་ཆེད་དྲ་རྒྱའི་ཁ་བྱང་ལག་ཁྱེར་སྤེལ་རྒྱུ་ཡིན་པར་བཤད་ཀྱང་། མཁས་དབང་མང་པོས་དེར་མོས་མཐུན་བྱེད་ཀྱིས་མེད་ལ། སློབ་དཔོན་དང་ཞིབ་འཇུག་པ། ཁྲིམས་རྩོད་པ་བཅས་ཀྱིས་དྲ་རྒྱའི་ཁ་བྱང་ལག་ཁྱེར་གྱི་ལས་གཞི་འདི་ནི་གཞུང་གིས་དྲ་ཐོག་ཏུ་སྒེར་དང་ལྷག་པར་དུ་སྤྱི་ཚོགས་ཀྱི་སྨྲ་བརྗོད་རང་དབང་ལ་དམ་བསྒྲགས་ཆེ་རུ་གཏོང་བ་དང་དབུས་སུ་བསྡུ་རུབ་བྱ་རྒྱུའི་ཆེད་བཀོལ་སྤྱོད་བྱེད་པའི་གདོང་འབག་ཅིག་ཡིན་པར་ཡིད་ཆེས་བྱེད་བཞིན་ཡོད། ཆིང་ཧྭ་མཐོ་རིམ་སློབ་གྲྭའི་ནག་ཉེས་ཁྲིམས་ལུགས་སློབ་དཔོན་ལའོ་ཏུང་ཡན་གྱིས་ཝེ་པོའི་སྟེང་དུ། འཆར་གཞི་འདི་ནི་༼ མི་ཚང་མའི་དྲ་ཐོག་སྤྱོད་ལམ་ལ་ལྟ་ཞིབ་ཡོ་ཆས་ཤིག་སྒྲིག་འཇོག་བྱེད་པ་དང་འདྲ་བ་ཞིག་སྟེ། མི་སོ་སོའི་དྲ་རྒྱ་འཚོལ་བཤེར་གྱི་ལོ་རྒྱུས་ལྟ་བུའི་དྲ་ཐོག་གི་རྗེས་ཤུལ་ཚང་མ་ལས་སླ་པོས་བསྡུ་རུབ་བྱེད་ཐུབ། ༽ཅེས་བྲིས་ཡོད། ཁོ་མོས་དྲ་རྒྱའི་ཁ་བྱང་ལག་ཁྱེར་ལ་སྐྱོན་བརྗོད་བྱས་པ་ནས་བཟུང་ཁོ་མོའི་ཝེ་པོ་ཁ་བྱང་བཀག་སྡོམ་བྱས་ཡོད། པེ་ཅིན་གྱི་ཁྲིམས་རྩོད་པ་ཝང་ཚེ་ལི་ཨང་གིས་ཝེ་པོའི་སྟེང་དུ་༼ ངའི་བསམ་ཚུལ་ཐུང་ཐུང་ཞིག་ནི། ང་རང་འདིར་རྒྱབ་སྐྱོར་མེད། མི་སྒེར་གྱི་གསང་དོན་ལ་བར་སྟོང་ཏོག་ཙམ་འཇོག་རོགས་ ༽ཞེས་བྲིས་ཡོད། ཡེལ་མཐོ་རིམ་སློབ་གྲྭའི་ཁྲིམས་ལུགས་སློབ་གཉེར་ཁང་པའོ་ཚེ་རྒྱ་ནག་ལྟེ་གནས་ཀྱི་ཆེས་མཐོའི་ཞིབ་འཇུག་སློབ་མ་རྒན་པས། རྒྱ་ནག་ནང་གི་མི་མང་རྣམས་ལ་ཏོག་དབྱེབས་ནད་ཡམས་སྐབས་རྒྱ་གཞུང་གིས་ནད་དུག་སྟངས་འཛིན་ཆེད་མི་སྒེར་གྱི་འགྲོ་འོང་ལ་ཐོ་འགོད་དང་ཚོད་འཛིན་བྱེད་པར་དྲ་ཐོག་ཁ་བྱང་གི་མ་ལག་ཅེས་འཕྲོད་བསྟེན་བརྡ་ཁྱབ་མ་ལག་བེད་སྤྱོད་བྱེད་ཡོད་པའི་ཐེངས་འདིའི་དྲ་ཐོག་ཁ་བྱང་མ་ལག་ལ་དོགས་ཟོན་ཆེ་བ་བྱེད་ངེས་རེད་ཅེས་བཤད་ཡོད།

སྤྱི་ཚོགས་དང་རྒྱལ་ཁབ་ཀྱི་ཐོག དྲ་རྒྱའི་ཁ་བྱང་ལས་རིམ་གསར་པ་འདི་ནི་རྒྱ་ནག་གིས་སྔར་ཡོད་བཞིན་པའི་འཕྲུལ་རིགས་ལག་རྩལ་དང་སྐྱེ་ཁམས་བརྟག་དཔྱད་ལྟ་ཞིབ་ལག་བསྟར་བྱེད་པའི་སྟེང་དུ་ཁ་སྣོན་ཞིག་ཡིན་པ་དང་། དེ་ནི་ཁོ་ཚོའི་རྒྱ་ནག་མི་མང་དང་གྲངས་ཉུང་མི་རིགས་དཔེར་ན་ཡུ་གུར་དང་བོད་རིགས་ལ་གཉའ་གནོན་གྱི་ལག་ཆ་ཞིག་ཏུ་འགྱུར་ཡོད། རྒྱལ་སྤྱིའི་ཚོང་ལས་ནང་འཕྲུལ་ཆས་ཁྱབ་ཁོངས་ཀྱི་སྤྱོད་མཁན་གྱི་སྒེར་གསང་དང་བདེ་འཇགས་ཐད་ལ་ཐོ་སྣང་ཆེན་པོ་ཡོད་བཞིན་པའི་སྐབས་འདིར། གསལ་ཆ་མེད་པའི་དྲ་རྒྱའི་ཁ་བྱང་དེ་ལྟ་བུས་རྒྱ་ནག་གི་འཕྲུལ་རིག་སྡེ་ཚན་རྣམས་ལ་རྒྱལ་སྤྱིའི་འཕྲུལ་རིག་ཚོང་རའི་ནང་མཉམ་ལས་བྱེད་རྒྱུ་དང་། སྔར་ཡོད་ཀྱི་རྒྱལ་སྤྱིའི་བདེ་འཇགས་སྒྲིག་གཞི་དང་མཐུན་སྒྲིག་བྱེད་པར་དཀའ་ངལ་ཆེན་པོ་འཕྲད་སྲིད། དྲ་རྒྱའི་ཞབས་ཞུ་རིན་མེད་དང་དར་ཁྱབ་ཆེ་བ་དེ་འདྲ་བེད་སྤྱོད་བྱེད་པ་དེས་ང་ཚོའི་སྒེར་གྱི་གནས་ཚུལ་དང་བདེ་འཇགས་རྣམས་ཤོར་འགྲོ་ཡི་ཡོད་པ་དེ་རྟག་ཏུ་དྲན་གསོ་བྱེད་རྒྱུ་ཧ་ཅང་གལ་ཆེན་པོ་རེད། དྲ་རྒྱའི་བདེ་འཇགས་ཀྱི་ལྟ་ཚུལ་ནས་བཤད་ན། མི་སྒེར་སོ་སོར་ཡོང་སྲིད་པའི་ལྟ་ཞིབ་དང་། བཀག་སྡོམ། དེ་བཞིན་དམིགས་འབེན་དུ་བཟུང་བའི་དྲ་འབུ་བཅས་ལས་སྔོན་འགོག་ཆེད་དྲ་རྒྱའི་ཁྱབ་ཁོངས་ནང་དུ་ཧ་ཅང་གཟབ་གཟབ་གནང་དགོས།

ང་ཚོའི་འཕྲུལ་ཆས་ནང་སྒེར་གསང་དང་བདེ་འཇགས་ལ་བཀག་སྡོམ་དང་ལྟ་ཞིབ་མི་ཡོང་བའི་ཆེད། གཤམ་གྱི་གལ་ཆེན་ལག་ལེན་བཟང་ཤོས་འགའ་ལ་དོ་སྣང་བྱེད་དགོས།

༡། གལ་ཏེ་ངེས་པར་དུ་མི་དགོས་ཚེ་ཁྱེད་ཀྱི་སྒེར་གྱི་གནས་ཚུལ་མ་སྤྲོད། ཁྲིམས་མཐུན་གྱིས་མ་གཏོགས་སྒེར་གྱི་ཞིབ་ཕྲའི་གནས་ཚུལ་མ་སྤྲོད་པ་ངེས་པར་བྱོས། དེའི་ནང་དུ་དྲ་རྒྱའི་སྡིངས་ཆ་གང་རུང་ལ་རང་མོས་ཀྱིས་སྒེར་གྱི་གནས་ཚུལ་མི་སྤྲོད་པའང་ཚུད་ཡོད། དུས་ཚོད་བཏོན་ནས་དྲ་རྒྱའི་སྡིངས་ཆའི་སྒེར་གསང་སྲིད་བྱུས་ཀློག་སྟེ་སྒེར་གྱི་གནས་ཚུལ་སྤྲོད་པ་ལ་ཉེན་ཁ་ཡོད་མེད་ངེས་གཏན་བཟོས།

༢། སྤྱི་ཚོགས་དྲ་ལམ་ཐོག་སྒེར་གྱི་གནས་ཚུལ་མ་འཇོག། སྤྱི་ཚོགས་བརྒྱུད་ལམ་གྱི་སྡིངས་ཆའི་སྟེང་དུ་སྒེར་གྱི་གནས་ཚུལ་འཇོག་མི་རུང་། གང་ཡིན་ཟེར་ན་གནས་ཚུལ་དེ་དག་དབང་འཛིན་པའི་སྲིད་གཞུང་གིས་ལྟ་ཞིབ་དང་འཇིགས་སྐུལ་བྱེད་པར་བེད་སྤྱོད་གཏོང་སྲིད།

༣། VPNs ཡང་ན་ Tor ལྟ་བུའི་བཀའ་འགོག་གཡོལ་ཐབས་ཡོ་བྱད་བེད་སྤྱོད་བྱེད་དགོས། ཡིད་ཆེས་འཕེར་བའི་ VPNs ཡང་ན་ Tor བེད་སྤྱོད་བྱས་ཏེ་ཁྱེད་རང་གི་སྒེར་གྱི་ངོ་བོ་སྦས་པ་དང་རྗེས་འདེད་གཏོང་ཐུབ་པའི་ནུས་པ་ཉུང་དུ་གཏོང་དགོས། ཡོ་བྱད་འདི་དག་གིས་དབང་འཛིན་པ་ཚོས་ཁྱེད་ཀྱི་འབྲེལ་གཏུག་ལ་ལྟ་སྐུལ་བྱེད་པ་ལས་སྲུང་སྐྱོབ་བྱེད་པར་རོགས་རམ་བྱེད་ཐུབ།

༤། ཁྱེད་ཀྱི་གློག་ཀླད་རྣམས་བདེ་འཇགས་ངང་ཉར་ཚགས་བྱོས། གསང་ཚིག་མཁྲེགས་པོ་བེད་སྤྱོད་བྱེད་པ་དང་། རིམ་པ་གཉིས་ཀྱི་ར་སྤྲོད་ (2FA) སྤྱོད་པ། གནོད་འཚེ་ཅན་གྱི་མཉེན་ཆས་མེད་པ་བཟོ་མཁན་གྱི་མཉེན་ཆས་འཇུག་སྒྲིག་བྱེད་པ་བཅས་ཀྱིས་ཁྱེད་ཀྱི་སྒྲིག་ཆས་རྣམས་ཆོག་མཆན་མེད་པར་ལྟ་སྤྱོད་བྱེད་པ་ལས་སྲུང་སྐྱོབ་བྱེད་དགོས།

༥། མ་སྒུག་པར་གསར་སྣོན་བྱོས། ཁྱེད་ཀྱི་གློག་ཀླད་ཀྱི་མཉེན་ཆས་/བཀོལ་སྤྱོད་མ་ལག་རྣམས་རྒྱུན་དུ་ཐོན་གསར་ཤོས་སུ་གསར་སྣོན་བྱེད་དགོས། དེས་བཙན་དབང་ངམ་ཡང་ན་འཆར་གཞི་མེད་པར་བཅུག་པའི་སོ་མྱུལ་མཉེན་ཆས་དང་གནོད་འཚེ་ཅན་གྱི་མཉེན་ཆས་ལས་སྲུང་སྐྱོབ་བྱེད་ཀྱིས་ཡོད།

༦། གློག་འཕྲིན་དང་འབྲེལ་ཐག་ལ་གཟབ་གཟབ་བྱོས། དྲྭ་བསླུ་དར་ཁྱབ་ལས་སྔོན་འགོག་བྱེད་པའི་ཆེད་དུ་དོགས་ཟོན་ཆེ་བའི་འབྲེལ་ཐག་གནོན་རྒྱུ་དང་། ཡང་ན་ཁུངས་ལྡན་མ་ཡིན་པ་ལས་ཕབ་ལེན་བྱེད་རྒྱུ་སྤོང་དགོས།