ཀུ་ཤུ་བཟོ་ཚོང་ཁང་གིས་རྒྱ་ནང་དུ་བོད་དང་འབྲེལ་བའི་གནས་ཚུལ་བཀག་སྡོམ།

ཀུ་ཤུ་བཟོ་ཚོང་ཁང་གིས་བོད་དང་འབྲེལ་བའི་གནས་ཚུལ་བཀག་སྡོམ་བྱེད་པའི་ལོ་རྒྱུས་རིང་པོ་ཡིན། ཕྱི་ལོ་ ༢༠༠༩་ལོར། ༧གོང་ས་སྐྱབས་མགོན་ཆེན་པོ་མཆོག་དང་འབྲེལ་བའི་བཀོལ་ཆས་ཁ་ཤས་ཀུ་ཤུའི་མཉེན་ཆས་ཕབ་ལེན་གྱི་མཛོད་ནང་ནས་མེད་པར་ཆགས་ཡོད་པའི་གནས་ཚུལ་ཕྱིར་ཐོན་ཡོད་རུང་། ཀུ་ཤུ་བཟོ་ཚོང་ཁང་གིས་བཀོལ་ཆས་བཟོ་སྐྲུན་བྱེད་མཁན་ཚོར། ཁོང་ཚོའི་བཀོལ་ཆས་ཁག་མཉེན་ཆས་ཕབ་ལེན་གྱི་མཛོད་ནང་ནས་མེད་པར་བཟོས་པའི་བརྡ་ལན་གང་ཡང་སྤྲད་མེད། བཀོལ་ཆས་བཀག་སྡོམ་གྱི་གནས་ཚུལ་འདི་དག་གི་ཐད་ལ། ངོ་རྒོལ་བྱེད་དུས། ཀུ་ཤུ་བཟོ་ཚོང་ཁང་གི་མགྲིན་ཚབ་པ་ཞིག་གིས། ང་ཚོའི་བཟོ་ཚོང་ཁང་གི་ངོས་ནས། མུ་མཐུད་དུ། ས་གནས་ཀྱི་ཁྲིམས་ལ་བརྩི་སྲུང་བྱེད་རྒྱུ་ཡིན་ཞེས་བརྗོད་ཡོད། 

ཕྱི་ལོ་༢༠༡༧ ལོའི་ཟླ་༡༢་པའི་ནང་། རྒྱ་ནང་དུ་འཚོགས་པའི་དཔྱད་གླེང་ཚོགས་འདུ་ཞིག་གི་སྟེང་དུ། ཀུ་ཤུ་བཟོ་ཚོང་ཁང་གི་སྤྱི་ཁྱབ་འགན་འཛིན། ཁྲིམ་ཁོ་ཁིག་ལགས་ལ། རྒྱ་ནག་སྲིད་གཞུང་དང་མཉམ་འབྲེལ་བྱས་ཏེ། ཀུ་ཤུའི་མཉེན་ཆས་མཛོད་ལ་བཀག་སྡོམ་བྱེད་ཀྱི་ཡོད་པའི་སྐོར་ལ་དྲི་བ་འདྲི་དུས། ཁོས། ཁྱེད་རང་གི་གདམ་ག་ནི། མཉམ་ཞུགས་བྱེད་རྒྱུ་ཡིན་ནམ། ཡང་ན། ར་བའི་འགྲམ་དུ་ཡར་ལངས་ཏེ། སྐད་གསེང་མཐོན་པོས་ལས་དོན་ཅི་ལྟར་སྒྲུབ་དགོས་མིན་སྐོར་ལ་འུར་སྒྲ་སྒྲོག་རྒྱུ་ཡིན། ངས་བསམ་ཚུལ་ནི་ཁྱེད་རང་ཡོང་སྟེ།མཉམ་ཞུགས་བྱེད་རྒྱུ་དེ་ཡིན་ལ། ཁྱེད་རང་རྩལ་འགྲན་ར་བའི་ནང་དུ་ཞུགས་དགོས།་རྒྱུ་མཚན་གང་ཡིན་ཞེ་ན། ར་བའི་འགྲམ་ནས་འགྱུར་བ་གང་ཡང་གཏོང་མི་ཐུབ་ཞེས་བརྗོད་ཡོད།

 

ཀུ་ཤུ་བཟོ་ཚོང་ཁང་ལ། རྒྱ་ནག་སྲིད་གཞུང་དང་མཉམ་འབྲེལ་བྱས་ཏེ། ཟུར་སྣེ་ལ་དེད་པའི་གྲངས་ཉུང་མི་རིགས་ཀྱི་འབོད་སྒྲ་ཁུ་སིམ་མེར་བཟོས་པར་ཆེས་ཐོག་མར་སྐྱོན་བརྗོད་ཕོག་ནས་ལོ་ངོ་བཅུ་འགོར་བའི་དུས་ཡུན་ཁྲོད་དུ། འགྱུར་བ་ཅི་ཞིག་ཕྱིན་ཡོད་དམ། ཀུ་ཤུ་བཟོ་ཚོང་ཁང་མུ་མཐུད་ནས་རྒྱ་ནག་སྲིད་གཞུང་གི་བཀའ་བཀོད་ཀྱི་རྗེས་སུ་ཤར་བསྐྱོད་བྱས་ཡོད། ཀུ་ཤུ་བཟོ་ཚོང་ཁང་གི་འགན་འཛིན་ཁྲིམ་ཁོ་ཁིག་གིས། རང་ཉིད་ཀྱི་བཟོ་ཚོང་ཁང་གི་ངོས་ནས་རྒྱ་ནག་ནང་དུ་བཟང་ཕྱོགས་ཀྱི་འགྱུར་བ་བསྐྲུན་པའི་རེ་བ་ག་དུས་བྱེད་སྲིད། 

དེ་ཡང་https://applecensorship.com དྲ་ངོས་ནས་ཕྱོགས་བསྡུས་བྱས་པའི་གཞི་གྲངས་ལ་གཞིགས་ན། དུས་ད་ལྟའི་ཆར། ཀུ་ཤུ་བཟོ་ཚོང་ཁང་གིས་རྒྱ་ནག་གི་ཀུ་ཤུའི་མཉེན་ཆས་ཕབ་ལེན་གྱི་མཛོད་ཁོངས་ནས། བོད་པ་དང་འབྲེལ་བའི་གྲགས་ཆེ་བའི་ཁ་པར་གྱི་བཀོལ་ཆས་༢༩ བཀག་སྡོམ་བྱས་ཡོད་འདུག་ལ། བོད་དང་འབྲེལ་བའི་གསར་འགྱུར་གྱི་བཀོལ་ཆས་དང་། ནང་ཆོས་སློབ་སྦྱོང་གི་བཀོལ་ཆས། ཡུལ་སྐོར་སྤྲོ་འཆམ་སྐོར་གྱི་བཀོལ་ཆས། ཐ་ན་རྩེད་མོའི་བཀོལ་ཆས་སོགས་ཀྱང་བཀག་སྡོམ་བྱས་ཡོད། བཀག་སྡོམ་བྱས་ཚར་བའི་བཀོལ་ཆས་ཁག་གི་ཐོ་གཞུང་གཤམ་དུ་བཀོད་ཡོད།

ཀུ་ཤུ་བཟོ་ཚོང་ཁང་གི་སྣེ་ཁྲིད་མི་སྣ་ཁག་གིས། ཁོང་ཚོའི་ངོས་ནས་བཀོལ་ཆས་ཁག་དོ་དམ་བྱས་ཏེ། གསལ་ཁ་མེད་པའི་རྒྱ་ནག་གི་ས་གནས་ཁྲིམས་སྲོལ་ལ་བརྩི་སྲུང་བྱེད་དགོས་ཞེས་བརྗོད་ཀྱི་ཡོད་རུང་། ཁོང་ཚོའི་བྱེད་ལས་ཁག་ལ་ཕྱི་གསལ་ནང་གསལ་གྱི་ཆ་གང་ཡང་མེད། 

བོད་དང་འབྲེལ་བའི་བཀོལ་ཆས་དང་དེ་བཞིན་བཀོལ་ཆས་གཞན་པ་མང་དག་ཅིག་རྒྱ་ནག་གི་ཀུ་ཤུའི་མཉེན་ཆས་ཕབ་ལེན་གྱི་མཛོད་ཁོངས་ནས་ཕྱིར་འདོན་བྱས་པ་དེས། རྒྱལ་སྤྱིའི་ཁྲིམས་ལུགས་ནང་གསལ་བའི་གཞི་རྩའི་འགྲོ་བ་མིའི་ཐོབ་ཐང་སྟེ། བོད་མི་ཚོའི་ཆ་འཕྲིན་རེག་པའི་ནུས་པ་དང་རང་དབང་གི་སྒོ་ནས་རང་ཉིད་ཀྱི་བསམ་ཚུལ་ལྷུག་བརྗོད་བྱེད་པའི་ཐོབ་ཐང་རྡོག་རོལ་བཏང་ཡོད་ཅེས།   GreatFire་ཟེར་བའི་ཚོགས་པ་དང་མཉམ་འབྲེལ་བྱས་ཏེ། བཀག་སྡོམ་བྱས་པའི་བོད་པའི་བཀོལ་ཆས་སྐོར་ལ་ཉམས་ཞིབ་བྱེད་མཁན་ནམ།  

བོད་ཀྱི་གློག་ཀླད་ཛ་དྲག་གྲ་སྒྲིག་ཚན་ཁག་ཡ་ལན་རུ་ཁག་གི་འབྲེལ་མཐུད་པ་རྡོ་རྗེ་ཕུན་ཚོགས་ལགས་ཀྱིས་བརྗོད་ཡོད། 

ཕྱི་ལོ་༢༠༡༩་ལོའི་ཟླ་༡་པོའི་ནང་། GreatFire ཚོགས་པས། applecensorship.com ཟེར་བའི་དྲ་གནས་ཤིག་ཤར་གཏོང་བྱས་ཡོད་ལ། དེའི་སྐབས་སུ། GreatFire ཚོགས་པའི་ཚོགས་གཞོན་སྐུ་ཞབས་མཱ་ཁྲིན་ཇོན་སིན་ལགས་ཀྱིས། ཀུ་ཤུ་བཟོ་ཚོང་ཁང་གི་ངོས་ནས། ཀུ་ཤུའི་མཉེན་ཆས་ཕབ་ལེན་གྱི་མཛོད་ཁང་བཀག་སྡོམ་དང་འབྲེལ་བའི་གནས་ཚུལ་རིགས། ཁོང་ཚོའི་ཕྱི་གསལ་ནང་གསལ་གྱི་སྙན་ཐོ་ནང་གསལ་ཁ་བཏོན་མེད་ལ། ཁྲིམ་ཁོ་ཁིག་ལགས་ཀྱིས་ཀུ་ཤུ་བཟོ་ཚོང་ཁང་གིས་རྒྱ་ནག་གི་ནང་དུ་ཅི་ཞིག་བྱེད་ཀྱི་ཡོད་མེད། གང་འདོད་ལྟར་བཤད་ཆོག་ཀྱང་། applecensorship.com དྲ་གནས་ཀྱིས། ཀུ་ཤུ་བཟོ་ཚོང་ཁང་གི་གནས་ཚུལ་བཀག་སྡོམ་གྱི་བྱེད་ལས་དང་འབྲེལ་བའི་གཞི་གྲངས་ངོ་མ་མཁོ་སྤྲོད་བྱེད་ཀྱི་ཡོད་ཅེས་བརྗོད་ཡོད།

རྒྱ་ནག་ནང་གི་ཀུ་ཤུའི་ཉེར་སྤྱོད་མ་ལག་ནང་དུ་བཀག་སྡོམ་བྱས་པའི་བཀོལ་ཆས་སྐོར་ལ་དཔྱད་ཞིབ།

བོད་པས་བཟོས་པའི་བཀོལ་ཆས་དང་ཡང་ན། བོད་པའི་ཆེད་དུ་བཟོས་པའི་བཀོལ་ཆས་མང་པོ་ཡོད་ལ། ཀུ་ཤུ་བཟོ་ཚོང་ཁང་གིས་རྒྱ་ནག་གི་ཀུ་ཤུའི་མཉེན་ཆས་ཕབ་ལེན་གྱི་མཛོད་ཁོངས་ནས་བཀོལ་ཆས་དེ་དག་མང་ཆེ་བ་བཀག་སྡོམ་དང་དོ་དམ་བྱེད་ཀྱི་ཡོད། དེར་བརྟེན། རྒྱུ་མཚན་ཅི་ཞིག་ལ་བརྟེན་ནས། བཀོལ་ཆས་དེ་དག་ཇི་ལྟར་བཀག་སྡོམ་བྱེད་ཀྱི་ཡོད་མེད་དང་། དེ་ལྟར་ཐག་གཅོད་བྱེད་དགོས་པའི་ཞིབ་ཕྲའི་རྒྱབ་ལྗོངས་སྐོར་ཤེས་རྟོགས་ཐུབ་རྒྱུ་ཧ་ཅང་གལ་ཆེ། དེ་ཧ་གོ་བར། བོད་ཀྱི་གློག་ཀླད་ཛ་དྲག་གྲ་སྒྲིག་ཚན་ཁག་གིས་རྒྱ་ནག་གི་ཀུ་ཤུའི་མཉེན་ཆས་ཕབ་ལེན་གྱི་མཛོད་ཁོངས་སུ་བཀག་སྡོམ་བྱས་པའི་བོད་པ་དང་འབྲེལ་བའི་བཀོལ་ཆས་ཀྱི་སྐོར་ལ་ཉམས་ཞིབ་ཅིག་བྱས་ཡོད། ཉམས་ཞིབ་དེ་མཐེབ་གཞོང་བྱེད་སྤྱད་དེ་བོད་པའི་བཀོལ་ཆས་འཚོལ་བཤེར་བྱས་པ་དང་། དེ་ནས་GreatFire ཚོགས་པས་མཁོ་སྤྲོད་བྱས་པའི་བཀོལ་ཆས་བཀག་སྡོམ་གྱི་སྡིངས་ཆ་བཀོལ་སྤྱོད་བྱས་ཡོད། 

བོད་ཀྱི་གློག་ཀླད་ཛ་དྲག་གྲ་སྒྲིག་ཚན་ཁག་གིས་ཀུ་ཤུའི་མ་ལག་ནང་གི་བོད་པ་དང་འབྲེལ་བའི་བཀོལ་ཆས་༡༡༩ ལ་དཔྱད་ཞིབ་བྱས་ཡོད་ལ། གཤམ་དུ་བཀོད་པའི་བཀོལ་ཆས་ཚང་མ་ཀུ་ཤུའི་མཉེན་ཆས་ཕབ་ལེན་གྱི་མཛོད་ནང་དུ། ‘Tibet’‘(བོད།)‘Tibetans’(བོད་པ།) ‘Dalai Lama’(ཏཱ་ལའི་བླ་མ།)‘Buddhism’(ནང་ཆོས།) ‘bhoe’(བོད།) ‘Tibetan Buddhism’(བོད་བརྒྱུད་ནང་བསྟན)་སོགས་འབྲི་དུས་རྙེད་ཡོད། རྙེད་སོན་བྱུང་བའི་བཀོལ་ཆས་དེ་དག་དབྱེ་བ་ལྔ་རུ་བགར་ཡོད་དེ། དེ་དག་ནི། ཆོས་དང་རིག་གཞུང་དང་། ཆ་འཕྲིན་དང་ཆབ་སྲིད། སྤྲོ་སྐྱིད། བཀོལ་སྤྱོད། ཤེས་ཡོན་བཅས་ཡིན།  

བཀོལ་ཆས་༡༡༩ ཚང་མ་https://applecensorship.com/  དྲ་ངོས་ནས། རྒྱ་ནག་ནང་བཀག་འགོག་བྱས་ཡོད་མེད་ཚོད་ལྟ་བྱས་ཡོད། བཀོལ་ཆས་༡༡༩ ཁོངས་ནས། ༢༩་བཀག་སྡོམ་བྱས་ཚར་ཡོད་པ་གཏན་འཁེལ་བྱུང་ཡོད། བཀག་སྡོམ་བྱས་པའི་བཀོལ་ཆས་དེ་དག་གི་ཁོངས་ནས། བཀོལ་ཆས་༧ ཆོས་ལུགས་དང་རིག་གཞུང་གི་ངོ་བར་འབྲེལ་བ་ཡོད་པ་དང་། བཀོལ་ཆས་༥  ཆ་འཕྲིན་དང་ཆབ་སྲིད་ལ་འབྲེལ་བ་ཡོད་པ་དེ་འདྲ་རེད་འདུག

བཀོལ་ཆས་གང་དག་བཀག་སྡོམ་བྱས་ཡོད་མེད་ལ་ཞིབ་ལྟ་བྱེད་དུས། བཀག་སྡོམ་གྱི་རྒྱུ་མཚན་དང་ཆ་རྐྱེན་ངོས་འཛིན་བྱེད་ཐུབ་ངེས། གལ་ཏེ། བཀོལ་ཆས་ཀྱི་མིང་གི་ཁོངས་སུ་༧གོང་ས་ཏཱ་ལའི་བླ་མ་མཆོག་གི་མཚན་ཡོད་ཚེ། བཀོལ་ཆས་དེ་བཀག་འགོག་བྱེད་ངེས་པ་དང་། ཆ་འཕྲིན་དང་འབྲེལ་བའི་བཀོལ་ཆས་ཡོངས་རྫོགས་བཀག་འགོག་བྱེད་ཀྱི་ཡོད། རྩེད་མོའི་བཀོལ་ཆས་གཅིག་ཁོ་ན་བཀག་འགོག་བྱས་ཡོད་པ་དེའི་མཚོན་རྟགས་བོད་ཀྱི་རྒྱལ་དར་བཞག་ཡོད།ཀུ་ཤུ་བཟོ་ཚོང་ཁང་གི་ངོས་ནས། བཀོལ་ཆས་གང་དག་བཀག་འགོག་བྱེད་ཀྱི་ཡོད་མེད་ཐད་ལ་ཕྱི་གསལ་ནང་གསལ་མེད་པས། བཀོལ་ཆས་བཟོ་སྐྲུན་མཁན་མང་པོ་ཞིག་གིས། གཅིག་བྱས་ན། རང་ཉིད་ཀྱིས་བཟོས་པའི་བཀོལ་ཆས་དེ་རྒྱ་ནག་ནང་དུ་བཀག་འགོག་བྱས་ཡོད་པ་ཤེས་ཀྱི་མེད། མིང་བརྗོད་འདོད་མེད་པའི་བོད་པའི་བཀོལ་ཆས་བཟོ་སྐྲུན་མཁན་ཞིག་གིས་བརྗོད་གསལ་ལྟར་ན། ཁོང་གིས་ལུང་པ་རྒྱ་ནག་འདེམས་དུས། རང་ཉིད་ཀྱིས་བཟོས་པའི་བཀོལ་ཆས་དེ་ཀུ་ཤུ་བཟོ་ཚོང་ཁང་གིས་འགྲེམས་སྤེལ་བྱེད་དུ་འཇུག་གི་མི་འདུག་ལ། འཆར་ངོས་སུ།ཁྱེད་ཀྱིས་རྒྱ་ནག་གི་དྲ་རྒྱའི་བཅའ་ཁྲིམས་རྩིས་མེད་བཏང་འདུག་ཟེར་བའི་འཕྲིན་ཐུང་ཞིག་མངོན་ཡོང་གི་འདུག  གསལ་ཆ་གང་ཡང་མེད་པའི་འཕྲིན་ཐུང་འདིས། མཉེས་ཆས་བཟོ་སྐྲུན་མཁན་གྱིས་ཇི་ལྟར་རྒྱ་ནག་གི་དྲ་རྒྱའི་བཅའ་ཁྲིམས་རྩིས་མེད་བཏང་ཡོད་པ་དང་། རྩིས་མེད་གཏང་སའི་དྲ་རྒྱའི་ཁྲིམས་གང་དང་གང་ཡིན་མིན། དེ་བཞིན་བསྐྱར་བཅོས་ཀྱི་གདམ་ག་སོགས་གང་ཡང་གསལ་པོ་སྤྲོད་ཀྱི་མི་འདུག དེ་ཡང་ཕྱི་གསལ་ནང་གསལ་གྱི་ཆ་གང་ཡང་མེད་པའི་མཉེན་ཆས་བཀག་སྡོམ་གྱི་སྲིད་ཇུས་ལ་གཞིགས་ནས་གླེང་ན། ཀུ་ཤུ་བཟོ་ཚོང་ཁང་གིས་མཉེན་ཆས་ག་ཚོད་ཅིག་ཐོག་མ་ཉིད་ནས་ཁྱབ་སྤེལ་བྱེད་དུ་མ་བཅུག་པར་བཀག་འགོག་བྱས་ཡོད་མེད་ཀྱི་གྲངས་ཀ་བཤད་ཚོད་ཐུབ་དཀའ་བ་ཞིག་རེད། 

བོད་བརྒྱུད་ནང་བསྟན་དང་འབྲེལ་བའི་བཀོལ་ཆས་ཁ་ཤས་བཀག་འགོག་བྱས་ཚར་ཡོད་ཀྱང་། ཁ་ཤས་ད་དུང་བཀག་འགོག་བྱས་མེད་པར་ལྷག་བསྡད་ཡོད་པ་དེའི་རྒྱུ་མཚན་གང་ཡང་གསལ་པོ་མི་འདུག  བོད་ཀྱི་གློག་ཀླད་ཛ་དྲག་གྲ་སྒྲིག་ཚན་ཁག་གིས་རིགས་འདྲ་བའི་མཉེན་ཆས་ཁག་གི་ཁོངས་ནས། ཁ་ཤས་བཀག་འགོག་བྱས་པ་གང་ཞིག་ལ། ཡང་མཉེན་ཆས་ཁ་ཤས་བཀག་འགོག་མ་བྱས་པའི་རྒྱུ་མཚན་གང་ཡིན་སྐོར་ལ་མུ་མཐུད་ནས་ཞིབ་འཇུག་མང་པོ་བྱེད་ཀྱི་ཡོད། གནས་སྟངས་ཁ་ཤས་ཁྲོད་དུ། བཀོལ་ཆས་ཤིག་རྒྱ་ནག་གི་མཉེན་ཆས་ཕབ་ལེན་གྱི་མཛོད་དུ་ཡོད་རུང་། (དཔེར་ན། ངོ་དེབ་ལྟ་བུ།)བཀོལ་ཆས་དེར་གནས་ཚུལ་མཁོ་སྤྲོད་བྱེད་མཁན་གྱི་འབྲེལ་ཡོད་དྲ་ཚིགས་དེ་བཀག་འགོག་བྱས་ཏེ། བཀོལ་ཆས་དེ་བེད་མེད་བཟོ་གི་ཡོད།  བོད་ཀྱི་གློག་ཀླད་ཛ་དྲག་གྲ་སྒྲིག་ཚན་ཁག་གིས་མཐེབ་གཞུང་གི་འཚོལ་བཤེར་བརྒྱུད་ནས་བོད་དང་འབྲེལ་བའི་བཀོལ་ཆས་རིགས་བཙལ་ཡོད། འོན་ཀྱང་། ཉམས་ཞིབ་བྱེད་སྟངས་ཀྱི་ཐབས་ལམ་འདི་ལ་སྐྱོན་ཆ་ཡོད་ངེས་པས། ཀུ་ཤུ་བཟོ་ཚོང་ཁང་གི་བོད་པ་དང་འབྲེལ་བའི་བཀོལ་ཆས་རིགས་བཀག་སྡོམ་བྱེད་སྟངས་སྐོར་གསལ་པོ་ཧ་གོ་བར་ང་ཚོས་ཐབས་ལམ་གཞན་པ་བཙལ་ཏེ། མ་འོངས་པར་ཉམས་ཞིབ་ཀྱི་གཞི་རྒྱ་ཆེ་རུ་གཏོང་ངེས་ཡིན། 

སྙན་ཐོ་འདིའི་སྐོར་ལ་རྒྱས་པ་མཁྱེན་འདོད་ཚེ།  བོད་ཀྱི་གློག་ཀླད་ཛ་དྲག་གྲ་སྒྲིག་ཚན་ཁག་གི་རྡོ་རྗེ་ཕུན་ཚོགས་(dorjee@tibetaction.net) དང་ཡང་ན། GreatFire.org ཚོགས་པའི་ཞར་ལེ་སི་མེ་ཐི་ལ་(charlie@greatfire.org)འབྲེལ་གཏུགས་བྱེད་རོགས།

ནོར་བཅོས།: ཡིག་ཟམ་གསར་ཤོག་གི་ཚུལ་དུ། ཕྱི་ལོ་༢༠༡༩་ལོའི་ཟླ་༥་པའི་ཚེས་༣༡་ཉིན་བཏང་བའི་སྙན་ཐོ་འདིའི་ཟིན་བྲིས་ཐོན་སྔ་མའི་༼ཀུ་ཤུ་བཟོ་ཚོང་ཁང་གིས་རྒྱ་ནག་ནང་བོད་ཀྱི་ཆ་འཕྲིན་བཀག་སྡོམ༽ནང་དུ། ཨ་རིའི་རླུང་འཕྲིན་ཁང་གི་བོད་སྐད་བཀོལ་ཆས་རྒྱ་ནག་གི་མཉེན་ཆས་ཕབ་ལེན་མཛོད་ནང་དུ་འདུག་ཅེས་ནོར་བ་བྲིས་ཡོད། ཨ་རིའི་རླུང་འཕྲིན་ཁང་གི་བོད་སྐད་བཀོལ་ཆས་རྒྱ་ནག་གི་མཉེན་ཆས་ཕབ་ལེན་མཛོད་ནང་དུ་མེད་པ་མ་ཟད། ཨ་རིའི་རླུང་འཕྲིན་ཁང་གི་བོད་སྐད་དྲ་ཚིགས་ཀྱང་རྒྱ་ནག་ནང་བཀག་འགོག་བྱས་ཡོད། 

ཀུ་ཤུ་བཟོ་ཚོང་ཁང་གིས་བཀག་སྡོམ་བྱས་པའི་བོད་པའི་བཀོལ་ཆས་ཁག

  1. Bangchen
  2. BuddhaApps
  3. Dalai Lama
  4. Dalai Lama Quotes
  5. Dharamsala Tourism Guide
  6. Drikung Kagyu Today
  7. Gangjong Tsegzhod Chenmo
  8. GCMGC
  9. Gyalwa Rinpoche
  10. Gyalwa Rinpoche’s Books
  11. Kirsan Buddhist Messenger
  12. PotRunner
  13. Radio Free Asia (RFA)
  14. Teachings of His Holiness the Gyalwa Rinpoche
  15. Teachings of Tibetan Buddhism
  16. Tenzin Gyatso Daily Surprise
  17. The Drikung Kagyu Today
  18. Tibet eRadio
  19. Tibet Times
  20. Tibet Travel Phrase
  21. Tibet.net
  22. Tibetan Book of the Dead
  23. Tibetan Buddhism – Pilgrimage to Tibet
  24. Tibetan News
  25. TibetOnline TV
  26. uTalk Classic Learn Tibetan
  27. VOA Tibetan
  28. Voice of Tibet
  29. 藏传佛教·课颂集
Back to Top